Wizara ya Kilimo, Chakula na Ushirika yakiri kuwepo kwa ubadhirifu wa fedha za wakulima wa tumbaku katika mkoa wa Tabora

Naibu Waziri wa Kilimo, Chakula na Ushirika, Mheshimiwa Adam Malima  ametoa kauli hiyo bungeni  wakati akijibu swali la Mbunge wa Tabora Kaskazini, Mheshimiwa Saffin Sumar  aliyetaka kujua serikali inawasaidiaje wakulima wa zao la tumbaku kutokana na ufisadi mkubwa unaofanywa na chama kilele cha APEX na Chama kikuu cha wakulima wa tumbaku kanda ya magharibi-WETCU kwa kuwaibia wakulima.

Naibu Waziri amesema ubadhrifu na wizi wa fedha kwa wakulima wa tumbaku mkoa wa Tabora ulitokana na viongozi wa WETCU kwa kushirikiana na baadhi ya watendaji wasiokuwa waaminifu wakiwemo watumishi wa mabenki.

Amesema katika kushughulikia tatizo hilo, serikali imeunda kamati maalumu chini ya uenyekiti wa Mkuu wa Mkoa wa Tabora  ambayo pamoja na mambo mengine itakuwa na jukumu la kuthamini madeni halali ya wakulima.

Read more

Mabaraza ya kata katika Halmashauri ya Manispaa ya Tabora yashindwa kutekeleza majukumu yake kwa ufanisi

Kutokana na kukosa vitendea kazi sanjari na posho ndogo zinazolipwa wakati wa uendeshaji wa kesi mbali mbali Mabaraza ya kata katika Halmashauri ya  Manispaa ya Tabora yameshindwa kutekeleza majukumu yake kwa ufanisi.

Katibu wa baraza la kata ya Mbugani Bwana Emmanuel Chambo amesema suala la vitendea kazi kwa mabaraza ya kata limekuwa ni changamoto inayokwamisha utendaji wa kazi zao.

Ameongeza  kuwa wamekuwa wakipokea kesi nyingi zinazowahusu wanandoa lakini wanashindwa kuzitolea  maamuzi sahihi kutokana na kukosa ushahidi wa kutosha kwani matukio mengi yanakuwa ni ya siri baina yao ndani ya chumba chao.

Bwana Chambo amefafanua kuwa ili haki ya mtu iweze kupatikana ni vizuri vyema kuwa na ushahidi kwa sababu sheria inahusika zaidi panapokuwa na ushahidi. 

Amewataka wananchi kuhakikisha wanakuwa na ushahidi wa kutosha wanapokwenda kufungua kesi katika baraza lolote la kata ili kutolewa maamuzi yanayojitosheleza kwa mujibu wa sheria.

Read more

Amuua Baba Yake kwa Ushirikina

JESHI la Polisi mkoani Rukwa linamsaka Richard Jecap (30) mkazi wa kitongoji cha Matai A kwa tuhuma za kumuua baba yake kwa kumpiga mpini kichwani akimtuhumu kuwa ni mshirikina.

Tukio hilo lilitokea Aprili 18 saa 4.50 asubuhi wakati baba huyo akiwa amekaa nyumbani kwake akiota jua. Akizungumza na gazeti hili, mwenyekiti wa kijiji hicho, Emmanuel Mwakibinga alisema kuwa mtuhumiwa alifanya mauaji hayo baada ya watoto wake kufariki ambapo mtoto wa kwanza mwenye umri wa miaka minne alifariki Januari mwaka huu na alikuwa akidai baba yake huyo ndiye aliyemloga.

Alisema kuwa Aprili 16 mtoto wake wa pili mwenye umri wa miaka miwili alifariki na alidai kuwa baba yake ndiye aliyemloga kwani amekuwa akiloga watoto wake hao na siku ya mazishi aliahidi kumfanyia kitu kibaya baba yake huyo licha ya kuwa hakueleza ni kitu gani. Mwenyekiti huyo alisema siku ya tukio hilo alikuwa akipita karibu na nyumba hiyo akasikia kishindo kikubwa kutoka eneo la nyumba hiyo na kisha kufuatia vilio vya watu na aliposogea alikuta mtuhumiwa huyo amekwishampiga mpini kichwani baba yake huyo na kisha kuanguka na kupoteza fahamu.

Baada ya kuona hivyo, walisaidiana pamoja na wanafamilia wengine kumwahisha hospitali na alitundikiwa maji sambamba na kushonwa katika jeraha kubwa alilolipata kichwani na usoni na kisha kulazwa ili kuendelea kupata matibabu.

Mwakibinga alisema kuwa wakati akiendelea kupatiwa matibabu alifariki dunia kutokana na kuvuja damu nyingi na maumivu makali aliyokuwa nayo katika jeraha alilolipata baada ya kupigwa na mpini wa shoka kichwani.

CHANZO: Gazeti Mwananchi

Read more

Wilaya ya Rombo Kutumia Nyuki Kupambana na Tembo Wavamizi

HALMASHAURI ya Wilaya ya Rombo imeanza mipango ya kutumia ufugaji wa nyuki kukabiliana na tembo waharibifu ambao mara kadhaa huvamia baadhi ya makazi ya wananchi maeneo mbalimbali ya wilaya hiyo na kufanya uharibifu wa mazao pamoja na kuua au kujeruhi wakazi.

Akizungumza na mwandishi wa habari hizi hivi karibuni wilayani hapa, Mkurugenzi Mtendaji wa halmashauri hiyo, Judethadeus Mboya alisema tayari halmashauri hiyo imetengeneza mizinga ya nyuki ambayo imesambazwa maeneo kadhaa ili kukabiliana na tembo waharibifu eneo hilo.

“Unajua nimetembea mbuga mbili za Kenya ikiwemo Tsavo ambazo tumepakana nazo eneo hili sehemu ambayo tembo hutokea huko na kuvamia maeneo yetu, sehemu hizi wao wamedhibiti uvamizi wa tembo…wamefuga nyuki wengi sana na maeneo mengine wametumia hadi teknolojia kuwazuia tembo kuvamia makazi ya raia hivyo hawapati madhara kama yetu,” alisema Mboya akifanya mazungumzo na gazeti hili ofisini.

Alisema kwa sasa tayari wametengeneza mizinga 50 ya nyuki na kuifunga ukanda wa chini wa vijiji kama Chala, Ibukoni, Ngoyoni na maeneo mengine ambayo tembo huyatumia kama njia kipindi cha uvamizi na kwa sasa mizinga mingine 100 ya nyuki inaandaliwa kuenezwa maeneo mengine kukabiliana na tembo hao hatari.

Alisema viongozi wa halmashauri hiyo pia wametoa elimu kwa wanakijiji maeneo husika ya kuhamasisha uvugaji nyuki katika vikundi ikiwa ni jitihada za kukabiliana na tembo hao waharibifu ambao idadi kubwa hutokea nchi jirani ya Kenya na kufanya uharibifu pamoja na kutishia maisha ya wanavijiji upande wa Tanzania.

Aidha kiongozi huyo alisema tembo hao mbali na kufanya uhalibifu mkubwa wa mazao ya wanavijijini kipindi cha uvamizi wakati mwingine wamekuwa wakiuwa raia jambo ambalo ni hatari zaidi kiusalama. Uchunguzi uliofanywa na mwandishi umebaini uvamizi wa wanyama hao umekuwa kero kwa maeneo mbalimbali ya vijiji vya wilaya hiyo, kiasi ambacho unatishia shughuli za maendeleo ya wananchi kama kilimo pamoja na maendeleo ya elimu kwa ujumla.

Akizungumzia hali ya uvamizi wa tembo na athari za elimu, Mwalimu wa Taaluma Shule ya Sekondari Tanya, Shuma Himidiel alisema miezi ambayo tembo huanza kufanya uvamizi huingilia ratiba za masomo na mara kadhaa kusimama kutokana na hofu ya wanafunzi na usalama wao hasa wanapotoka na kuja shuleni.

“Kimsingi wanyama hawa wanapoanza usumbufu kijiji kizima huwa na heka heka na wakati mwingine hata wanafunzi wanashindwa kuja shule kuhofia maisha yao…hata wazazi huwazuia watoto wao kutoka hadi hali ya hatari inaporejea kuwa ya kawaida. Akifafanua zaidi mwalimu Himidiel alisema mara ya mwisho tembo kufanya uvamizi katika Kijiji cha Tanya waliua mtu mmoja walipokuwa wakidhibitiwa na askari wa wanyamapori eneo hilo.

Na Alex.

Read more

Walimu mkoani Tabora wametakiwa kufanya kazi kwa busara, uvumilivu na nidhamu

Mwenyekiti wa Bodi ya Ushauri ya Chuo cha Ualimu TABORA, Bwana PETER LABIA amesema kuwa walimu lazima wawe mfano wa kuigwa katika jamii kutokana na kuwa na nidhamu na kufanya kazi yao kwa kutumia busara zaidi.

Bwana LABIA alikuwa akizugumza katika mahafali ya 58 ya Chuo cha Ualimu cha NDALA wilayani NZEGA ambapo aliwatunuku vyeti wahitimu 465 wa mafunzo ya ualimu ngazi ya cheti.

Akimkaribisha kutunuku vyeti kwa walimu hao watarajiwa, Mkuu wa Chuo cha Ualimu NDALA, Bibi ALFRIDA ABEL amewahimiza wahitimu kuwatii viogozi wa mamlaka watakazoenda kutumikia huku wakidumisha amani, umoja na ushirikiano.

Kwa upande wao, wahitimu wa amfunzo ya ualimu Chuo cha NDALA wameahidi kutoa elimu bora kwa wanafunzi kadri ya uwezo wao kwa kuzingatia mafunzo waliyopata na kwamba watakuwa wapiganaji dhidi ya magonjwa ya UKIMWI na malaria.

Read more

Jumla ya wanafunzi 7,338 hawakujiunga katika shule mbalimbali za sekondari za kata wilayani Karagwe mkoni Kagera katika kipindi cha mwaka 2010 hadi 2012

Mkuu wa Wilaya ya KARAGWE, DARRY RWEGASIRA  amesema wanafunzi hao hawakujiunga na elimu ya sekondari pamoja na kufaulu mtihani wa taifa katika kipindi hicho.

Pia amebainisha kuwa katika mwaka 2010 wanafunzi waliochaguliwa walikuwa 5,150  Kati ya hao 1,177 hawakuripoti shuleni huku  mwaka 2011 wanafunzi 5,107 walichaguliwa na 2,155 hawakuripoti shule.

RWEGASIRA ameongeza kuwa  katika mwaka 2012 kati ya wanafunzi 8,871 waliochagulia, wanafunzi 4,006 hawakuripoti shuleni.

Hata hivyo, amesema shule nyingi za sekondari katika wilaya hiyo hazina miundombinu iliyodumu kutokana na baadhi ya wazazi kutokuwa na mwamko wa kuchangia maendeleo ya shule.

Read more